Enti Rregullator i Energjisë (ERE) ka vendosur uljen e çmimit të energjisë për konsumatorët familjarë, duke e përcaktuar atë në 8.5 lekë për kilovat orë (kWh) për ata që konsumojnë deri në 700 kWh në muaj.
Ky vendim u miratua gjatë mbledhjes së mbajtur të mërkurën, pas shqyrtimit të kërkesës së Operatorit të Shpërndarjes së Energjisë Elektrike (OSHEE) për rregullimin e çmimeve.
Çmimi aktual i energjisë ishte 9.5 lekë për kWh, ndërsa pas këtij vendimi do të zbresë me 1 lek për kWh për konsumatorët që përdorin deri në 700 kWh në muaj. Ky çmim i ri do të aplikohet për periudhën nga 1 shkurt 2025 deri më 31 dhjetor 2025.
Konsumatorët që tejkalojnë kufirin e 700 kWh do të vazhdojnë të paguajnë 9.5 lekë për kWh për gjithë sasinë e konsumuar. Çmimet për kategoritë e tjera të konsumatorëve mbeten të pandryshuara.
