Fuqitë perëndimore kanë ndërmarrë një tjetër seri sanksionesh ndaj Bjellorusisë si përgjigje për uljen me forcë të avionit të Ryanair për të arrestuar gazetarin opozitar, Roman Protasevich.
Bashkimi Evropian, Shtetet e Bashkuara, Britania dhe Kanadaja renditën në listën e zezë më shumë zyrtarë, ligjvënës dhe ministra nga administrata e Presidentit Alexander Lukashenko, forca ajrore e të cilit përgjoi aeroplanin Ryanair që fluturonte midis Athinës dhe Vilniusit më 23 maj në atë që Perëndimi e quajti pirateri shtetërore.
“Ne jemi të bashkuar në shqetësimin tonë të thellë në lidhje me sulmet e vazhdueshme të regjimit Lukashenko ndaj të drejtave të njeriut, lirive themelore dhe ligjit ndërkombëtar. Ne jemi të bashkuar në thirrjen që regjimi t’i japë fund praktikave të tij shtypëse kundër njerëzve të tij”, thanë Bashkimi Evropian, Shtetet e Bashkuara, Britania dhe Kanada në një deklaratë të përbashkët.
Me këtë veprim qeveritë perëndimore u përpoqën të përshkallëzonin presionin ndaj Lukashenkos, i cili akuzohet se manipuloi zgjedhjet vitin e kaluar pas 27 viteve që qëndron në pushtet.
Nuk pati asnjë reagim të menjëhershëm nga Lukashenko i cili ka mohuar manipulimin e votës, dhe ka akuzuar gazetarin e arrestuar Roman Protasevich për komplotin e një revolucioni, dhe gjithnjë e më shumë i është drejtuar Rusisë për mbështetje.
Raundi i fundit i sanksioneve që prej zgjedhjeve të diskutueshme të vitit të kaluar e çon numrin e ligjvënësve, zyrtarëve, gjykatësve dhe komandantëve ushtarakë të Bjellorusisë në 166 persona, përfshirë 78 të cilët janë në listën e zezë të BE.
