Ditën e sotme në aeroportin e Kukësit është kryer testimi i uljes së avionëve duke ulur avionin e parë shumë pranë pistës, por pa prekur tokën duke qenë se punimet vijojnë ende.
Ministrja e Infrastrukturës Belinda Balluku deklaroi se pas pak ditësh do të kemi rezultatet nga gara për Aeroportin e Vlorës. Balluku tha se brenda 4-vjeçarit të ardhshëm PS synon të nisë punimet për aeroportin e Korçës dhe Sarandës të cilët do i shërbejnë turizmit.
“Sot jemi në aeroportin e Kukësit, vetëm një muaj nga fluturimi i parë. Punët kanë pasur një ecuri shumë të shpejtë. Sot është një ditë e veçantë pasi do të kemi një fluturim prove.
Duke nisur nga sot dhe në ditët në vijim do të ketë disa të tilla. Të qartësojmë edhe një gjë tjetër kur themi se avioni do të ulet shumë pranë pistës por nuk do të prekë tokën për shkak se në pistë ende punohet. Pas pak ditësh do të kemi rezultatet nga gara për aeroportin e Vlorës. Për ne që vijmë nga kjo fushë para disa vitesh do dukej ëndërr e largët. Vetëm në dy vite dorëzojmë një aeroport të ri dhe nisim punë për një aeroport të tretë. Brenda 4-vjeçarit do të nisim punën për dy aeroporte të tjera që janë ndërkombëtare për nevoja turistike si ai i Korçës dhe Sarandës duke përmbyllur një strategji me 5 Aeroporte.
Lajme të mira do të ketë në aviacion që është goditur nga pandemia. Aviacioni ka pësuar një humbje në trafik se 65%. Me qindra mijëra punonjës kanë humbur vendet e tyre të punës. Dëmi ka qenë i madh.
Shpresojmë që pas vaksinimit të kemi mundësi të udhëtojmë sërish dhe të kthehemi në shifrat e 2019. Që edhe ne me projektet tona të ecim përpara dhe shqiptarët të përfitojmë çmime të ulëta dhe shërbim cilësor”, tha Balluku.
