Tensionet në kufirin mes Rusisë dhe Ukrainës, si dhe rreziku i mundshëm për një pushtim të kësaj të fundit ka bërë që Aleanca e Atlantikut të jetë në gatishmëri. Nën drejtimin e Shteteve të Bashkuara të Amerikës, NATO është vendosur në gatishmëri dhe po shtrëngon radhët në Evropën Lindore duke dërguar më shumë anije dhe avionë luftarakë.
Agjencia Reutuers bën një pasqyrë se ku janë të disklokuara trupat e NATO-s dhe se si vendet që janë anëtare të aleancës mbrojnë hapësirat ajrore të njëra-tjetrës. Kështu hapësira ajrore e Shqipërisë mbrohet dhe mbulohet nga Italia dhe Greqia, Maqedonia e Veriut vetëm nga Italia, Mali i Zi nga Italia dhe Greqia, ndërsa Kosova e cila nuk është pjesë e Aleancës mbrohet nga trupat ndërkombëtare të KFOR-it. “Rreth 3,500 trupa aleate dhe partnere operojnë në Kosovë si pjesë e forcës paqeruajtëse të KFOR-it të deleguar nga NATO. Aleatët gjithashtu ofrojnë mbështetje ajrore për aleatët më të vegjël ballkanikë. Hapësira ajrore e Sllovenisë mbrohet nga Hungaria dhe Italia, ndërsa Shqipëria dhe Mali i Zi mbulohen nga Greqia dhe Italia. Qielli i Maqedonisë së Veriut kontrollohet nga Italia”, shkruan Reuters.
VENDET BALTIKE
Në Estoni, Lituani, Letoni dhe Poloni, NATO ka rreth 4000 trupa në batalione shumëkombëshe, të mbështetur nga tanke, mbrojtje ajrore dhe njësi të inteligjencës dhe mbikëqyrjes. E përshkruar nga NATO si e gatshme për luftim, prania e forcës së lehtë është projektuar si një forcë e gatshme në rast të një agresioni. NATO gjithashtu ka një mision policor ajror në këto vende, duke patrulluar qiejt e katër vendeve në një mision të mbikëqyrur nga baza ajrore ‘Ramstein’ në Gjermani. NATO ka gjithashtu katër forca detare shumëkombëshe që patrullojnë ujërat ndërkombëtare, duke përfshirë Detin Baltik.
RUMANIA, BULGARIA
NATO ka një forcë tokësore shumëkombëshe deri në 4,000 trupa në Rumani. Franca ka theksuar se do të dërgojë më shumë trupa. Gjithashtu, Shtetet e Bashkuara kanë ushtarë të vendosur në baza të veçanta në Rumani dhe Bullgari. Aleatët dërgojnë rregullisht detashmente luftarakë për të mbështetur hapësirën ajrore kombëtare të Bullgarisë dhe Rumanisë.
FRANCA
Franca është duke udhëhequr elementët ajrorë, tokësorë dhe detarë së bashku me Gjermaninë për vitin 2022, të njohur si ‘Task Forca e Përbashkët e Gatishmërisë së Lartë. Me të paktën 5000 ushtarë, forca mund të jetë operacionale brenda 72 orëve. Spanja, Portugalia dhe Polonia do të dërgojnë trupa këtë vit. Në gatishmëri janë 40,000 trupa të NATO-s.
TRUPAT E SHBA-SË NË EVROPË
Rreth 74,000 personel ushtarak amerikan janë të stacionuar sot në Evropë, sipas Shërbimit Kërkimor të Kongresit të SHBA, por jo të gjithë janë trupa në detyrë aktive. Gjermania pret rreth 36,000 trupa amerikane, Italia rreth 12,000, Britania rreth 9,000, Spanja rreth 3,000 dhe Turqia 1,600. Shtetet e Bashkuara gjithashtu kanë në lëvizje rreth 4,500 trupa përmes Polonisë, por ato nuk janë të vendosura në mënyrë të përhershme. Shumë nga këto forca mund të dislokohen në emër të NATO-s.
MESDHEU
NATO ka një mision detar, Sea Guardian, që patrullon Detin Mesdhe dhe siguron situatat në për aleatët, si dhe mbështet operacionet kundër terrorizmit./Rel
