Rusia hapi luftë e para ndaj Ukrainës dhe për këtë do të japë llogari në gjykatën e Hagës. Ukraina ka ngritur një padi kundër Rusisë në Gjykatën Ndërkombëtare të Drejtësisë të OKB-së në Hagë.
Këtë lajm e dha vetë presidenti I Ukrainës Volodymyr Zelensky. Çështja në fjalë do të shkojë në një gjykatë që zgjidh mosmarrëveshjet midis shteteve në lidhje me të drejtën ndërkombëtare.
Rusia do të përballet me akuzën për gjenocid. Presidenti tha se kërkojnë një vendim urgjent që urdhëron Rusinë të largohet nga territori i Ukrainës.
Ndërkohë presidenti rus Vladimir Putin ka falënderuar forcat speciale ruse duke deklaruar se ata po përmbushin heroikisht detyrën e tyre ushtarake në Ukrainë.
Në një fjalim televiziv që u publikua në faqen e internetit të Kremlinit, Putin përshëndeti shërbimin e tyre në emër të popullit të Rusisë dhe “atdheut tonë të madh”, theksoi ai.
“Dua të falënderoj komandën, personelin e forcave operacionale, veteranët e njësive të forcave speciale për besnikërinë e tyre ndaj betimit, për shërbimin e tyre pa asnjë të metë në emër të popullit të Rusisë dhe atdheut tonë të madh”, deklaroi Putin.
Ai e përfundoi mesazhin duke thënë “Uroj fat, suksese dhe gjithë të mirat për ju dhe më të dashurit tuaj”.
Fjalimi i Putin ishte përgatitur në kuadër të ditës së forcave speciale të Rusisë, e cila mbahet më 27 shkurt që prej vitit 2015.
