Analisti Lutfi Dervishi ka reaguar me ironi në rrjetet sociale, duke kritikuar një nga premtimet më të përsëritura të qeverisë Rama – furnizimin me ujë të pijshëm 24 orë në ditë.
Në një postim në Facebook, Dervishi e quan Shqipërinë “Republika e Premtimeve” dhe përdor një ton sarkastik për të denoncuar kontrastin mes propagandës politike dhe realitetit të përditshëm të qytetarëve.
Sipas tij, ndonëse premtimet për ujë të pandërprerë janë bërë pjesë e çdo fushate elektorale, për shumë qytetarë uji i pijshëm mbetet një luks i munguar. Këtë e ilustron edhe me një foto të njoftimit të pallatit, që e ka ujin me orar.
Ai thekson se problemet nuk kanë të bëjnë vetëm me mungesën e ujit, por edhe me çmimet e rritura dhe administrimin e paaftë të sektorit.
Postimi:
Rrjedh në këngë e ligjërime
Më 2013, u premtua ujë 24 orë në ditë. Dhe si çdo premtim, edhe ky u mbajt… por në versione të përmirësuara:
Nga 24 orë, qytetarët marrin rregullisht ujë me çmim të trefishuar në tre vakte:
Në mëngjes për të larë fytyrën,
në drekë për të zier fasulen,
dhe në darkë për të larë mëkatet.
Kush guxon të kërkojë ujë jashtë këtij orari konsiderohet si “armik i pompës dhe i partisë dhe ndëshkohet me… nofkën “çyryk”!
Pompa punon vetëm kur ka ujë në rrjet.
Administratori është gjithmonë aty, por vetëm për të të kujtuar që edhe kur ke pompë, s’ke fuqi mbi rrjetin!
Sepse në Republikën e Premtimeve,
uji rrjedh veç në këngë e ligjerime!
