Ish-kryeministri, Sali Berisha, ka denoncuar këtë të premte një aferë të kryebashkiakut të Matit, Agron Malaj në lidhje me një tender ujësjellësi. Berisha shprehet se ‘epidemia Veliaj’ është përhapur kudo. Duke publikuar mesazhin e qytetarit digjital, Berisha shkruan “Bashkia Mat ka tenderuar tre herë një ujësjellës me vlerë 10 milionë euro për disa fshatra, por ujë nuk ka”.
Ndëkrohë 3 ditë më parë Denisa Vata, kryetarja e degës së Partisë Demokratike në Mat, ka bërë akuza të forta ndaj kryebashkiakut socialist të Matit. Ajo ka deklaruar se SPAK-u duhet të marrë masa dhe të thërrasë Malajn për të dhënë llogari, pasi ndaj tij ekzistojnë akuza të rënda për korrupsion që datojnë që në nëntorin e vitit 2023.
Vata theksoi se Malaj ka shfrytëzuar pozicionin e tij për të përfituar kontrata të mëdha me institucione shtetërore në favor të familjarëve të tij. “Kryebashkiaku socialist i Matit ka përdorur pushtetin për të përfituar kontrata me para publike në favor të familjarëve të tij,” tha Vata. Ajo shtoi se kompania “GLOBAL SECURITY”, e cila është në pronësi të familjes Malaj, ka përfituar 5.4 miliardë lekë nga 360 transaksione me institucione të shtetit gjatë viteve 2014-2023.
Vata gjithashtu denoncoi favorizime të dyshimta nga Këshilli i Basenit Ujor Mat, duke pyetur: “Përse vëllait të Agron Malajt i miratohen brenda ditës nga Këshilli i Basenit Ujor Mat lejet për përdorimin e ujit dhe të burimit, pa marrë parasysh faktorët ligjorë dhe kërkesat e qytetarëve?” Ajo vuri në dukje mospërfilljen e ndikimit mjedisor dhe kërkesave të komunitetit në projekte si HEC Traja 1 dhe HEC Madhesh.
POSTIMI I PLOTË
Bashkia Mat ka tenderuar tre herë ujësjellësin 10 milionë euro, por deri sot gjurmë të tij nuk ekzistojnë. Epidemia “Veliaj” e përhapur në çdo bashki të Rilindjes.
Doktor, Bashkia e Matit ka tenderuar 3 herë ndërtimin e ujësjellësit për fshatrat e Njësisë Administrative Derjan dhe Rukaj dhe nuk është shtruar asnjë metër tub, asnjë pikë ujë nuk ka shkuar te banorët, ndërkohë paratë nuk dihet ku kanë përfunduar! Banoret vazhdojnë të mbushin ujë me gomar. Janë afro 10 milionë euro të kontraktuara, edhe pse asnjë banor i vetëm nuk është furnizuar me ujë!
