Ministri në Detyrë për Europën dhe Punët e Jashtme, Gent Cakaj, është karantinuar pas kthimit nga Itali dhe News 24 raporton se Cakaj është futur në izolim duke zbatuar protokollin e vendosur nga autoritetet për personat që vijnë nga jashtë.
3 ditë më parë ministri udhëtoi për në Itali, ku përcolli grupin me mjekë dhe infermierë shqiptarë që do të ndihmojnë atje në përballimin e krizës shëndetësore dhe u kthye me 150 emigrantët që u riatdhesuan.
Kujtojmë se gjatë udhëtimit me mjekët shqiptarë, por edhe gjatë takimit me homologun e tij italian Di Maio, Cakaj nuk kishte as maskë e as doreza, veprim i cili shkaktoi reagime të shumta në rrjetet sociale.
https://www.facebook.com/LuigiDiMaio/videos/209003807091853/
Tashmë Cakaj, prej dy ditësh nuk është paraqitur në zyrë dhe po qëndron i izoluar.
Ditën e sotme ka shkuar në 243 numri i të prekurve nga COVID-19, pasi gjatë 24 orëve të fundit janë shënuar 20 raste të reja nga 145 testime të kryera.
Sakaq, mëngjesin e sotëm ka ndërruar jetë edhe një 62-vjeçar nga Durrësi, duke e çuar në 13 totalin e viktimave, teksa në urgjencën e Infektivit janë të shtruar 77 persona, ku 8 prej tyre ndodhen në terapi intensive, 3 prej të cilëve janë intubuar.
Durrësi ka një shtim të ndjeshëm të numrit të të prekurve me 12 raste të reja, duke shkuar në 26, por nga ana tjetër gjatë 24 orëve të fundit janë shëruar edhe 8 pacientë duke e çuar numrin në 52 numrin e të shëruarve në total.
Shpërndarja gjeografike e rasteve pozitive, është si vijon:
– Tiranë 129 raste
– Durrës 26 raste
– Lushnje 4 raste
– Elbasan 5 raste
– Fier 23 raste
– Kavajë 4 raste
– Rrogozhinë 2 raste
– Korçë 15 raste
– Vlorë 5 raste
– Shkodër 8 raste
– Lezhë 5 raste
– Berat 1 rast
– Has 2 raste
– Krujë 5 raste
-Tropojë 4 raste
– Pukë 3 raste
– Mirditë 2 raste
