Dita e parë e këtij viti e gjen Kosovën pa viza për të udhëtuar në zonën Shengen. Sot kryeministri i Kosovës, Albin Kurti nga aeroporti Ndërkombëtar i Prishtinës “Adem Jashari”, ka uruar të gjithë qytetarët për këtë ditë të shënuar për shtetin Kosovar.
Kurti tha se sot do të udhëtojnë për në Vjenë 50 qytetarë dhe se tashmë shtetasit kosovarë kanë mundesi të udhëtojnë pa viza në 32 vende të Europës. Sipas kryeministrit po hiqet një padrejtësi e madhe që ndër vite e ka pasur Kosova.
“Kemi pritur shumë gjatë, nga sot po hiqet një padrejtësi. Qytetarët tanë tashmë do të mund të lëvizin në 32 vende. Sot do të udhëtojnë për në Vjenë 50 qytetarë të cilët kanë fituar këtë mundësi në kuadër të fushatës tonë. Të respektojnë kriteret, dhe kudo që të udhëtojmë mos të harrojmë se shtëpia jonë është Kosova. Urime viti i ri dhe për herë të fundit urime liberalizimi i vizave”, tha Kurti.
Kujtojmë se Komisioni Evropian ka vlerësuar që nga korriku i vitit 2018, se Kosova i ka përmbushur të gjitha standardet e Udhërrëfyesit për Liberalizimin e Vizave. Por, për shkaqe politike dhe reflektime të brendshme, vendimi ishte shtyrë.
Vendimi për liberalizimin e vizave për Kosovën u botua të martën e 25 prillit në Gazetën Zyrtare të Bashkimit Evropian. Me këtë veprim u përmbyll edhe formalisht i gjithë procesi i liberalizimit të vizave për qytetarët e Kosovës.
