Një nga kërkesat më të mëdha që Universiteti Bujqësor i Tiranës ka bërë ndër vite ka qenë ndërtimi i një ferme didaktike, ku studentët do kenë mundësi të praktikohen.
Tashmë është bërë realitet, sepse UBT do të marrë 1 milion euro fond nga qeveria, të cilat universiteti mund t’i përdorë për nevojat e tij, por parësore është ndërtimi i fermës didaktike.
Këtë fakt e ka bërë publik vet Ministri i Bujqësisë dhe Zhvillimit Rural, Bledi Çuçi gjatë një deklarate për median.
“Ferma me sipërfaqe 135 Ha është një sipërmarrje që bëhet për herë të parë në vendin tonë. Ajo përfshin ngritjen e infrastrukturës didaktike trainuese dhe demonstruese, sistemimin e tokës dhe reahabilitimin e sistemit të ujitjes, rritjen e mekanizimit, mbarështimin e kafshëve dhe krijimin e koleksioneve të bimëve. Ajo do të shërbejë gjithashtu si një qendër kërkimore për pedagogët, për praktikat mësimore të studentëve dhe për trajnimin e specialistëve të bujqësisë.
Do të jetë gjithashtu edhe një atraksion për turistët, sidomos pjesa e kopshtit zoologjik me kafshët e buta. Ngritja e kësaj ferme do të jetë për Universitetin Bujqësor të Tiranës edhe një formë alternative për të siguruar të ardhura për vetë universitetin”, tha ministri Çuçi.
Gjithashtu ministri ka thënë që është shumë e rëndësishme marrëdhënia mes universitetit dhe Ministrisë së Bujqësisë.
“Ne do ta përdorim ekspertizën e Universitetit Bujqësor si shërbim konsulence për të hartuar politika dhe projekte në fushën e bujqësisë, zhvillimit rural, sigurisë ushqimore, peshkimit dhe veterinarisë. Ky universitet mbetet një pol i rëndësishëm i kërkimit shkencor dhe i ka të gjitha kapacitetet për t’i shërbyer nevojave të vendit në fushën e bujqësisë dhe zhvillimit rural”, u shpreh ministri.
