Pas mbledhjes së jashtëzakonshme që po mbahet në Kongresin amerikan, ku pritet votimi për certifikimin e fituesit të zgjedhjeve të 3 nëntorit, Joe Bidenit, është përshkallëzuar protesta pranë ndërtesës së Kapitolit në Uashington.
Sipas asaj që raportojnë mediat amerikane, disa protestues kanë thyer kordonin e policisë, duke u futur edhe në ambientet e ndërtesës së Kapitolit ku edhe po mbahet votimin nga kongresmenët.
Ndërkohë presidenti në detyrë, Donald Trump ka deklaruar se nënpresidenti, Mike Pence nuk bëri maksimumin për të mbrojtur vendin.
Nga ana tjetër për këtë situatë ka reaguar edhe djali i Donald Trump, Donald Trump JR.
Ai ka publikuar një video të protestuesve që përleshen me policinë dhe shkruan: Kjo është e gabuar ne nuk jemi këta. Bëni protestë paqësore. Ne kemi një vend për të shpëtuar edhe kjo që po bëni nuk ndihmon aspak.
Mbështetësit e Donald Trump kanë arritur që t’i kalojnë barrierat mbrojtëse dhe të futen në brendësi të Kapitolit në SHBA.
Ndërkohë, CNN raporton se zv/presidenti Mike Pence është evakuuar nga ndërtesa ku ndodhej për Sesionin e Përbashkët të Kongresit. Po ashtu, raportohet se votimi për certifikimin e votave elektorale është pezulluar, pasi protestuesit u futën në ndërtesë.
Po ashtu CNN ka raportuar edhe se një grua ka mbetur e plagosur në Kongresin amerikan gjatë mësymjes së protestuesve pro-Trump brenda ndërtesës së Kapitolit.
Nuk dihet nëse bëhet fjalë për një protestuese, por burimet sqarojnë se gjendja e saj është kritike pasi u qëllua në gjoks me armë zjarri. Ende nuk janë dhënë detaje mbi rrethanat e të shtënave.
