Autoriteti i Konkurrencës është “zgjuar” nga gjumi i gjatë. Jo më kot, po vijnë festat. Dhe çfarë festash do ishin pa një shfaqje të re nga cirku i institucioneve që paguhen për të mbrojtur interesat e qytetarëve.
Denar Biba, mjeshtri i artit të të bërit sikur, na njofton se do monitorojë çmimet. Po, po – i njëjti Autoritet që nuk pa asnjë problem kur çmimi i qumështit u rrit 43%. I njëjti institucion që shpalli “treg normal” kur katër kompani kontrollojnë gjithë tregun e bulmetrave. Tani do na shpëtojë nga rritja e çmimeve për festat.
“Do të ndërmarrim të gjitha masat e nevojshme”, na premton AK-ja. Çfarë masash? Si ato që mori kur çmimet e ushqimeve u rritën 9 herë më shumë se inflacioni? Apo si atëherë kur gjeti zgjidhjen brilante për monopolin e taksive në Rinas – “hiqni tabelën ‘ndalohet taksi'”?
Na bëjnë thirrje të raportojmë rastet e abuzimit. Te kush t’i raportojmë? Te institucioni që u hoqi gjobën 5 milionë euro kompanive të miellit me një të rënë të lapsit? Apo te rojtarët besnikë të oligarkëve që kanë kthyer tregun shqiptar në pronë private të një grushti njerëzish?
Ndoshta Biba mendon se shqiptarët kanë harruar. Kanë harruar si çdo vendim i tij ka qenë një puthje për monopolet dhe një shpullë për qytetarët. Kanë harruar si nën “mbikëqyrjen” e tij, tregu i lirë u kthye në piknik privat për oligarkët.
Por ironia më e madhe është premtimi për të “mbrojtur konkurrencën e ndershme”. Nga kush do ta mbrojë? Nga vetja? Sepse për vite me radhë, AK ka qenë gardiani më besnik i sistemit që ka vrarë çdo formë të konkurrencës së ndershme në këtë vend.
Tani që po vijnë festat, AK do bëjë sehir nëpër dyqane. Do numërojë çmimet që vetë i ka lejuar të rriten pa kontroll. Do bëjë sikur mbron konsumatorin që e ka braktisur prej vitesh. Është një shfaqje që e kemi parë shumë herë.
Qytetarët nuk kanë nevojë për cirk festash. Kanë nevojë për institucione që vërtet mbrojnë interesat e tyre. Kanë nevojë për një treg që nuk kontrollohet nga një grusht oligarkësh. Kanë nevojë për drejtësi ekonomike, jo për shfaqje mediatike.
Por ndoshta është më mirë të vazhdoni gjumin tuaj të rehatshëm. Të paktën kur flini nuk nënshkruani vendime që varfërojnë edhe më shumë popullin shqiptar.
