Bajram Begaj u zgjidh presidenti i ri i vendit me 78 vota pro, 4 kundër dhe 1 abstenim. Ndërkohë nga kalkulimet e bëra, dyshohet se një votë pro zgjdhjes së Begaj ka “rrjedhur” nga opozita.
Në procesin e votimit morën pjesë 83 deputetë, nga të cilët 74 ishin nga mazhoranca. Nga opozita votuan Mesila Doda, Shpetim Idrizi, Nusret Avdullai, Monika Kryemadhi, Petrit Vasili, Erisa Xhixho ndërsa në votime morën pjesë edhe tre deputetë të PSD.
Votat kundër mendohet se kanë ardhur 3 nga LSI dhe 1 nga PDIU. Aludohet se 1 votë abstenim të ketë ardhur nga deputetët e PDIU, e po kështu një prej deputetëve të kësaj partie të ketë votuar pro për presidentin Begaj.
Kujtojmë që pasi kryeministri Edi Rama zyrtarizoi emrin e kandidatit për president mbrëmjen e djeshme, shefin e Shtabit të Përgjithshëm të FA, Bajram Begajn, gazetari Klodian Tomorri ka ironizuar me anë të një statusi në rrjetet sociale duke treguar se doli hapur parashikimi që kishte bërë disa ditë më parë.
Tomorri akuzon Begajn se ka firmosur dorëzimin e pronave të ushtrisë.
“Çfarë rastësie, çfarë rastësie! Shefi i Shtabit që ka firmosur për dorëzimin e pronave të ushtrisë, tani bëhet President”, shkruan gazetari Klodian Tomorri, i njohur për denoncimet e tij ndaj vendimeve të padrejta dhe abuzive të qeverisë.
