Ditën e djeshme Gjermania zhvilloi zgjedhjet parlamentare, ku për herë të parë pas 16 vitesh të sundimit të Angela Merkel ka fituar partia Social-Demokrate.
Në Bundestagu-un Gjerman do të jetë edhe një deputete shqiptare. Afërdita Suka, është deputetja shqiptare e sapo zgjedhur në landin e Berlinit.
Së fundmi në një intervistë për Euronews Albania, ajo ka treguar se ka pasur një mbështetje nga shqiptarët të cilët jetojnë dhe punojnë në Gjermani. Afërdita Suka ka garuar në zgjedhje nën siglën e Partisë së Gjelbër dhe ka marrë rezultate shumë të mira.
“Kanë qenë gjithmonë pranë meje dhe kanë besuar se do të fitoj. Kandidatura ime ka ndikuar shumë si mobilim i shqiptarëve, jo vetëm të shkojnë të votojnë por edhe të interesohen për politikën. Po patjetër do jem në parlament. Unë do të përfaqësoj në landin e Berlinit zonën ku jam zgjedhur”, tregoi ajo.
Kujtojmë se Social Demokratët e qendrës së majtë (SPD) fituan 25.7% të votave, përpara 24.1% për bllokun konservator CDU/CSU të Merkel, sipas rezultateve të përkohshme. Të Gjelbrit dolën me 14.8% dhe liberalët Demokratët e Lirë (FDP) ishin me 11.5%.
Rimëkëmbja e SPD shënon një ringjallje paraprake për partitë e qendrës së majtë në pjesë të Evropës, pas zgjedhjes së demokratit Joe Biden si president i SHBA në 2020. Partia opozitare e qendrës së majtë të Norvegjisë fitoi gjithashtu një zgjedhje në fillim të këtij muaji.
