Një atentat me armë zjarri ka ndodhur pak pas mesnate në lagjen nr.18 të qytetit të Durrësit, ku mbeti i vrarë 29-vjeçari Ermir Dedja.
I riu u transportua me urgjencë në spital, por nuk mundi t’i mbijetojë plagëve dhe ndërroi jetë pak orë më vonë.
Policia dhe grupi hetimor mbërritën menjëherë në vendngjarje dhe kanë nisur kontrollet për identifikimin dhe kapjen e autorit ose autorëve të dyshuar.
Sipas të dhënave të deritanishme, Ermir Dedja rezulton të jetë një emër i njohur për policinë. Në vitin 2017 ai u arrestua si bashkëpunëtor në një plagosje me armë zjarri, ndërsa në vitin 2015 ishte ndaluar si i dyshuar për shpërndarje të lëndëve narkotike që dyshohej se do të trafikoheshin drejt Kosovës nga dy shtetas nga Hasi.
Autoritetet po punojnë për zbardhjen e plotë të të gjitha rrethanave dhe për lidhjet e mundshme të së kaluarës kriminale të viktimës me atentatin e ndodhur.
