Kosova nisi ditën e sotme procesin e vaksinimit për Covid-19 dhe i pari që mori vaksinën e AstraZeneca ishte kryeministri Albin Kurti. Kurti ka folur menjëherë pas vaksinimit duke thënë se nuk shfrytëzoi postin e tij për t’u vaksinuar, por se ka dashur të japë shembull e të inkurajojë qytetarët të heqin dilemat e të marrin vaksinën. Ai tha se po bëhen përpjekiet maksimle që të vijnë më shumë vaksina. Kryeministri i Kosovës ka deklaruar se vaksinimi është i nevojshëm dhe është zgjidhja përfundimtare për të shpëtuar nga pandemia.
“Si kryeministër nuk jam këtu që ta shfrytëzojë privilegjin që të vaksinohem por të inkurajoj të gjithë qytetarët të vaksinohen meqenëse mbrëmë ka ardhur kontingjenti i parë i vaksinave, do të kemi edhe vaksina tjera dhe do të përpiqemi maksimalisht që sa më shpejtë dhe sa më shumë qytetarë të vaksinojmë. Me shembullin tim dua t’i inkurajoj të gjithë qytetarët të vaksinohen dhe të heqin dilemat. Vaksinimi është i nevojshëm, po përballemi me një pandemi të vështirë dhe zgjidhja përfundimtare është vaksinimi i popullsisë ”, ka thënë Kurti.
Kosova mori mbrëmjen e djeshme 24 mijë dozat e para të vaksinës anti-Covid të AstraZeneca-s me anë të programit COVAX nga OBSH, ndërsa më shumë vaksina pritet të vijnë në javët në vazhdim.
