Ambasadorja e SHBA-së në Tiranë, Yuri Kim u takua ditën e sotme me kryeministrin Rama.
Ky takim u zhvillua dy ditë pas shembjes së Teatrit Kombëtar e protestave të nisura për këtë shkak.
Ambasada e SHBA-ve, ka zbardhur edhe takimin e sotëm nëpërmjet një statusi në rrjetin social Facebook.
Mësohet se gjatë bisedës me Ramën, ambasadorja e SHBA-së i ka theksuar Ramës rëndësinë e diskutimeve në qeverisje pasi Shqipëria po synon anëtarësimin në BE.
Statusi i plotë i Ambasadës së SHBA-ës
Ambasadorja e SHBA Yuri Kim u takua sot me Kryeministrin Rama për të diskutuar mbi ngjarjet e fundit.
Ambasadorja theksoi rëndësinë që ka gjithëpërfshirja dhe diskutimet e mirëmenduara në qeverisje, në përputhje me statusin e Shqipërisë si anëtare e NATO-s dhe vend që synon anëtarësimin në BE.
Ata u pajtuan se është thelbësore që Shqipëria të vijojë në rrugën e saj drejt arritjes së dakortësisë për reformën zgjedhore dhe masave të tjera që u janë premtuar qytetarëve të Shqipërisë.
Ambasadorja Kim do të takohet edhe me kreun e PD-së Basha së shpejti.
