Një nga ngjarjet më të rënda dhe tronditëse ka goditur komunitetin shqiptar në Itali, duke lënë pas dhimbje, shok dhe një heshtje të rëndë që nuk mbushet dot me fjalë. Në qytetin e Lucca, mbrëmjen e së mërkurës, më 4 shkurt, katër anëtarë të së njëjtës familje shqiptare humbën jetën në mënyrë tragjike, si pasojë e një rrjedhjeje gazi nga kaldaja e banesës së tyre.
Arti Kola, 48 vjeç, bashkëshortja e tij Jonida Kola, 43 vjeçe, djali i tyre Hajdar Kola, 22 vjeç dhe vajza e mitur Xhesika Kola, vetëm 15 vjeçe, u gjetën të pajetë në shtëpinë trekatëshe ku jetonin. Një familje e tërë u shua brenda pak orësh, pa zhurmë, pa asnjë mundësi shpëtimi, nga monoksidi i karbonit që dyshohet se u çlirua nga një defekt në sistemin e ngrohjes.
Detajet nga vendngjarja e bëjnë këtë tragjedi edhe më të dhimbshme. Kur karabinierët dhe ekipet e emergjencës hynë me forcë në banesë, pasi nuk morën asnjë përgjigje nga brenda, gjetën tryezën të shtruar, ushqimin gati dhe një darkë që nuk do të konsumohej kurrë. Familja ishte bërë gati të ulej së bashku, në atë ritual të përditshëm familjar që simbolizon qetësi, bashkim dhe normalitet. Pikërisht aty, në shtëpinë e tyre, në momentet më të zakonshme të jetës, ndodhi fundi.
Alarmin e dha vëllai i kryefamiljarit, i cili, i shqetësuar nga mungesa e kontaktit, njoftoi karabinierët. Ai ishte personi i parë që u përball me tragjedinë, por edhe i prekuri i pestë e saj. Pak çaste pas hyrjes në banesë, nën sytë e forcave të rendit, ai humbi ndjenjat për shkak të ekspozimit ndaj monoksidit të karbonit. Vetëm ndërhyrja e shpejtë e karabinierëve bëri të mundur nxjerrjen e tij në kohë dhe transportimin me urgjencë drejt spitalit të Cisanellos, ku ndodhet ende nën kujdes mjekësor.
Katër anëtarët e familjes u gjetën të shtrirë në dysheme, pa shenja jete. Autoritetet italiane kanë nisur hetimet për të përcaktuar saktësisht shkakun e rrjedhjes së gazit dhe për të verifikuar nëse kaldaja kishte pasur defekte të mëparshme.
Në vendngjarje mbërriti edhe kryebashkiaku i Porcarit, Leonardo Fornaciari, i cili reagoi me një mesazh të ngarkuar me dhimbje dhe tronditje. Ai theksoi se komuniteti i vogël është i shokuar nga humbja e një familjeje të tërë, duke kujtuar se kjo tragjedi zgjon plagë të vjetra, pasi në të njëjtën bashki, po në muajin shkurt, 34 vite më parë, një familje tjetër humbi jetën në të njëjtën mënyrë.
Në vitin 1992, familja italiane Malanca, Raffaello, bashkëshortja e tij Piera dhe vajzat Ilaria dhe Greta, u shuan nga monoksidi i karbonit i çliruar nga një kaldajë me defekt. Sot, historia është përsëritur pothuajse identike. Në këtë zonë ndodhet ende një park publik që mban emrin e familjes Malanca, një kujtesë e dhimbshme se tragjeditë e tilla nuk harrohen, por as nuk janë shmangur plotësisht.
Familja Kola njihej në komunitet si e qetë, punëtore dhe e respektuar. Arti Kola punonte në një fabrikë, Jonida ishte shtëpiake, e përkushtuar ndaj familjes. Djali i tyre Hajdari kishte nisur jetën e punës si elektricist në një kompani lokale, ndërsa Xhesika ishte studente, një vajzë e re me ëndrra dhe plane që u ndërprenë në mënyrën më të padrejtë.
Sot, një shtëpi ka mbetur bosh, një tryezë e shtruar ka mbetur e paprekur dhe katër jetë janë shuar pa lamtumirë. Një tragjedi që ka lënë në zi jo vetëm të afërmit, por një komunitet të tërë dhe mbarë opinionin publik shqiptar.
