Nuk kanë kaluar shumë kohë që nga inaugurimi i “Rrugës e Arbërit”, një nga segmente më të rëndësishëm për banorët e Dibrës. E ndonëse ka pak që është futur në funksion, projekti i rëndësishëm për dibranët, që shkurton distancën midis Tiranës dhe Dibrës, ka nisur të ketë probleme.
Me ardhjen e sezonit ët Dimrit, shirave dhe motit të paqëndrueshëm, “Rruga e Arbërit” është kthyer në një problem për udhëtarët të cilët kalojnë në këtë rrugë të cilët ndihen të shqetësuar dhe tejet të rrezikuar. Sot pas reshjeve të vazhdueshme të shiut, në aks janë krijuar probleme.
Më problematike situata paraqitet në Bypassin e Murrizit ku ka rënie të shumta të gurëve. Rrëshqitja e tokës si pasojë e fryrjes nga shiu ka bërë që në një gjatësi të konsiderueshme ky segment të bëhet i vështirë për qarkullimin e automjeteve si rezultat i pranisë së gurëve.
Autoritetet këshillojnë drejtuesit e mjeteve që të tregohen tepër të kujdesshëm gjatë qarkullimit, të reduktojnë shpejtësinë dhe të zbatojnë sinjalistikën. Kujtojmë se vetëm një ditë pas hapjes,”Rruga e Arbërit” u bllokua totalisht nga reshjet e dëborës. Ngricat përfshinë bypass-in e Qafës së Murrizit, teksa qytetarët nisën të qarkullojnë përmes rrugës së vjetër. “Rruga e Arbërit” u shtrua nga kompania “Gjoka Konstruksion”.
