KPK vendosi më 12 janar të shkarkojë nga detyra gjyqtaren e Shkodrës, Ermira Dedeja pasi u konkludua se kishte kryer deklarim të pasaktë të burimeve të një apartamenti dhe një autoveture, si dhe ka rezultuar në pamundësi financiare për krijimin e tyre.
Ndërkohë, gjyqtarja Dedeja u vlerësua pozitivisht për pastërtinë e figurës dhe e aftë profesionalisht. Procesi i vetingut për gjyqtaren Dedeja u krye nga trupa e KPK-së e kryesuar nga Pamela Qirko, me relatore Etleda Çiftjan dhe anëtar Roland Ilian. Ermira Dedeja e ka filluar karrierën në sistemin e drejtësisë në vitin 1993 dhe punoi prej gati tre dekadash si gjyqtare në Gjykatën e Rrethit Shkodër.
Komisioni konkludon se Dedeja nuk ka deklaruar të drejtat reale të kësaj pasurie në vitin 2008, pasi nga hetimi ka rezultuar se në këtë periudhë bashkëshorti ka lidhur kontratën e furnizimit me energji elektrike në apartamentin që ka porositur pas dy vjetësh.
Sipas BIRN, Dedeja ka këmbëngulur se kanë filluar të banojnë në atë apartament vetëm në mars të vitit 2009 kur dhe është deklaruar, duke argumentuar se më parë nuk ka pasur konsumim të energjisë elektrike. Por Komisioni vëren se ka pasur faturime për muajin nëntor të vitit 2008 dhe dy muajt e parë të 2009-ës, si dhe i çmon të paqarta shpjegimet e subjektit lidhur me mosdeklarimin e të drejtave reale mbi këtë apartament në vitin 2008.
