Një operacion i koduar “Night Strike” ka çuar në pranga një 28-vjeçar nga Elbasani, i cili u kap duke shpërndarë lëndë narkotike në zonën turistike të Livadhit, Himarë.
Policia e Vlorës, në bashkëpunim me Komisariatin e Himarës, ndërhyri pas informacioneve të marra në kohë reale, duke e arrestuar të riun në flagrancë. Gjatë kontrollit fizik dhe të dhomës ku ai ishte akomoduar, u gjetën e sekuestruan 120 doza kokainë, 65 doza kanabis dhe një shumë parash, të dyshuara si të përfituara nga aktiviteti kriminal.
Sipas hetimeve paraprake, 28-vjeçari përgatiste dozat e drogës në dhomë dhe më pas i shiste në zonat e frekuentuara nga pushues vendas dhe turistë të huaj përgjatë vijës bregdetare.
