Kontrolli i Lartë i Shtetit (KLSH), ka deklaruar se do të nisë sa më shpejt verifikimin e procedurave të ndërtimit të rrugës Borsh-Sarandë, e cila tre ditë më parë u shemb për shkak të reshjeve të shiut.
Kjo rrugë është restauruar nga firma “Salillari” pak kohë më parë, mirëpo ky restaurim ka ngritur dyshime nëse është bërë realisht, pasi kjo rrugë pësoi dëmtime të rënda në një pjesë pranë fshatit të Borshit, duke paralizuar qarkullimin, por edhe duke vënë në rrezik jetët e shoferëve që përdorin këtë aks.
“Salillari” është kompania që e ndërtoi rrugën një vit më parë, por edhe firma që kryen mirëmbajtjen e këtij aksi.
Urdhri i KLSH-së është firmosur nga kryetari Arben Shehu, i cili ka urdhëruar kontrollin urgjent dhe ngritjen e një grupi pune për verifikimin e procedurave të punimeve.
Po ashtu edhe Autoriteti Rrugor Shqiptar (ARRSH), tre ditë pas çarjes së rrugës në Borsh ka reaguar në një sqarim në faqen zyrtare në rrjetin social Facebook duke deklaruar se do të bëhet një studim emergjent për atë që pritet të vendoset në të ardhmen për këtë segment.
Kujtojmë se reshjet e fundit nxorën në pah edhe cilësinë e dobët të ndërtimit të rrugës në aksin Borsh – Sarandë, ku rikonstruktimi rrugës i vetëm 6 muajve më parë në lagjen Vonja, u amortizua dhe u ça në mes./Gazetareforma.com/
