Një ngjarje e rëndë ndodhi ditën e sotme në Tiranë, ku një 28-vjeçar humbi jetën pasi u rrëzua aksidentalisht nga një lartësi në hotelin ku po qëndronte në bulevardin “Dëshmorët e Kombit”. Në fakt, bëhet fjalë për hotelin “Rogner”. Detajet i ka bërë të ditura gazetarja Dorjana Bezat, e cila ka thënë se i riu që ka humbur jetën është Ajdin Mustafi. Ai kishte ardhur mbrëmjen e kaluar nga Zvicra, ndërsa humbi jetën tragjikisht duke u rrëzuar nga dritarja e katit të pestë në hotel “Rogner”.
Mësohet se 28-vjeçari ishte mbështetur në kangjellat e dritares, por si pasojë e amortizimit ato janë shkëputur dhe i riu ka rënë nga kati i pestë, mbi një automjet të parkuar poshtë hotelit.Ngjarja është konsideruar aksidentale nga Policia e Tiranës, megjithatë kanë nisur hetimet. Ndërkohë, ndaj hotelit pritet që të merren masa, ndërsa punonjësit kanë ndërhyrë për të përforcuar me vida kangjellat e dritareve të tjera në dhomat e hotelit.
Njoftimi i policisë për ngjarjen në fjalë:
Tiranë/Informacione paraprake
Në bulevardin “Dëshmorët e Kombit”, dyshohet se ka rënë aksidentalisht nga lartësia e hotelit ku po qëndronte shtetasi A. M., 28 vjeç, i cili ka humbur jetën në spital.
Grupi hetimor po punon për sqarimin e rrethanave të ngjarjeve.
