Ka humbur sot jetën 57 vjeçari nga Ballshi, Pelivan Sinorrapaj. Viktima kishte nëntë ditë i shtruar në spitalin e Traumës në Tiranë për shkak se ndodhej në gjendje të rëndë shëndetësore.
Mësohet se shkak i ngjarjes së rëndë ishte një sherr banal mes 57 vjeçarit dhe shokëve të tij. Sinorrapaj u rrah barbarisht nga një grup personash me të cilët kishte konsumuar alkool. Shkak i sherrit në lokal midis tyre ishte një debat për çështje politike.
Sinorrapaj u gjet i gjakosur dhe pa ndjenja nga kalimtarë të rastit në Ballsh. Ka qenë pasditja e datës 29 janar kur Pelivan Sinorrapaj, së bashku me tre shokët e tij Fitim Zekaj 42 vjeç, Festim Alimetaj 53 vjeç dhe Ferdinand Meraj 44 vjeç të tre banues në Ballsh Mallakastër, pasi kishin konsumuar alkool në një lokal në Ballsh, më pas kanë debatuar për pagesën e tavolinës.
Babai i tre fëmijëve u dërgua për mjekim të specializuar në spitalin e Traumës në Tiranë por fatkeqësisht ka ndërruar jetë.
Autoritetet policore bëjnë me dije se kanë kryer ndalimin e tyre dhe kanë marrë dhe masën e sigurisë me burg ditsa ditë më parë. Theksohet se si viktima ashtu dhe shokët e tij njiheshin si konsumatorë të rregullt alkooli në qytetin e Ballshit.
