Mbrëmjen e sotme mjeku i njohur Pëllumb Pipero, teksa ishte i ftuar në ‘Open’ ka bërë me dije se një prej mjekëve të infektuar nga koronavirusi është edhe doktor Dhimitër Kraja apo i njohur nga kolegët e tij si Luli.
Doktori u kthye në Infektiv pas 48 vitesh punë për të ndihmuar kolegët për të përballuar fluksin ndaj koronavirusit, pasi prej vitesh ishte në pension.
Sipas Piperos, Kraja është i shtruar në Spitalin Infektiv dhe ka simptoma të lehta duke shtuar se për të po kujdesej vetë shefja e Infektivit, Najada Çomo.
BISEDA NË STUDIO:
Eni: Kemi informacione që ka drejtues të Spitalit Infektiv me koronavirus, është e vërtetë?
Mjeku: Drejtues të Spitalit? Profesore Najada Çomo është drejtuese, nuk është e infektuar.
Eni: Po mjek të prekur dhe që janë të shtruar në Infektiv?
Mjeku: Mjek po, është profesor Dhimitër Kraja që është i prekur dhe është shtruar në Infektiv, por me sipmotma të lehta. Ai u kthye në punë dhe tashmë është infektuar, por që ka sipmoma të lehta, se sa di unë.
Sakaq, mjeku tha se në spital ka pacientë në gjendje të rëndë, shumë të vështirë dhe në gjendje më të lehtë, pra situata duket dinamike.
Më tej, shtoi se pacientët janë në gjendje të rënduar psikologjike dhe ndihen të vetmuar, teksa tregoi edhe një rast kur babë e bir, të dy të shtruar duhet të ndaheshin, pasi babai duhej të futej në terapi intensive, mirëpo Pipero tha se ai nuk donte të ndahej nga i biri.
Ditën e sotme ndërruan jetë 2 pacientë duke e çuar në 15 numrin e viktimave nga COVID-19 në vendin tonë, sakaq, ka shkuar në 243 numri i të prekurve nga COVID-19, pasi gjatë 24 orëve të fundit janë shënuar 20 raste të reja nga 145 testime të kryera.
Në urgjencën e Infektivit janë të shtruar 77 persona, ku 8 prej tyre ndodhen në terapi intensive, 3 prej të cilëve janë intubuar.
Durrësi ka një shtim të ndjeshëm të numrit të të prekurve me 12 raste të reja, duke shkuar në 26, por nga ana tjetër gjatë 24 orëve të fundit janë shëruar edhe 8 pacientë duke e çuar numrin në 52 numrin e të shëruarve në total.
Ndërkohë, mbrëmjen e sotme ministrja e Shëndetësisë, Ogerta Manastirliu ka dhënë lajmin e mirë se edhe 5 pacientë të tjerë nga Tirana, Fier dhe Kavaja janë shëruar nga koronavirusi, duke e çuar në 52 numrin e të shëruarve.
Sipas saj, të gjithë kanë qënë për më shumë se 2 javë në Spitalin Infektiv, madje 2 prej tyre kanë qënë në gjendje të rëndë, megjithatë ia kanë dalë që të shërohen.
