Një plagosje me armë ndodhi ditën e djeshme në Tiranë, në rrugën “Myslym Shyri”. Një 26-vjeçar u qëllua me plumb në kokë, teksa ishte duke rregulluar një kondicioner në një vilë 3-katëshe që po rikonstruktohej.
Ditën e sotme mësohet se 26-vjeçari, Indrit Çelaj ka ndërruar jetë në spital, pasi ishte në gjendje kome që nga dita e djeshme.
Sipas policisë së Tiranës viktima Indrit Çelaj, lindur në Mallakastër dhe banues në Tiranë u qëllua nga një person me iniciale L.V., i cili është shpallur në kërkim.
I riu nga Mallakastra ka qenë duke punuar së bashku me një punëtor tjetër. Ky i fundit i ka treguar policisë se autori i ngjarjes së rëndë kishte ardhur papriturr dhe kishte nisur të konfliktohej me Indritin.
Në një moment ai ka nxjerrë një pistoletë dhe e ka qëlluar në kokë Çelajn duke e lënë të plagosur rëndë të riun.
Ka qenë kolegu që e ka çuar 26-vjeçarin në spital, ku mësohet se ndodhet në gjendje kome. Punëtorët ishin duke kryer punime në vilën e B.K., i cili ishte me pushime.
