Ish-deputeti i LSI. Ralf Gjoni ka qenë në zyrën e Prokurorisë Speciale Kundër Korrupsionit (SPAK) për rreth katër orë, duke dhënë dëshmi në lidhje me hetime të ndërmarra ndaj ish-presidentit Ilir Meta dhe bashkëshortes së tij, Monika Kryemadhi. Ndërsa Ralf Gjoni nuk dha komente specifike mbi përmbajtjen e dëshmive të tij, ai theksoi rëndësinë e mbështetjes për SPAK-un, në kundërshtim me qëndrimet më kritike të ish-shefit të tij, Ilir Meta.
Gjoni shpjegoi se është pyetur si qytetar i angazhuar në pozicione shtetërore, por jo si subjekt i hetimit: “Jam pyetur si shtetas në cilësinë e të angazhuarit në angazhime dhe pozicione shtetërore. Nuk u pyeta si person në hetim. Nuk ka arsye për të më hetuar mua. Nuk kam qenë pjesë e dosjes së ish presidentit Meta, se s’kam qenë në kontakt me të kur ka qenë kryetar shteti.”
Ndryshimi i rrugëve mes Gjonit dhe çiftit Meta-Kryemadhi erdhi në vitin 2019, kur Gjoni refuzoi të dorëzonte mandatin e tij si deputet. Prokuroria po heton lidhjet dhe marrëdhëniet që Gjoni ka pasur me Meta dhe Kryemadhin, në kuadër të hetimeve për çështje të ndryshme që përfshijnë kontratat e lobimit në SHBA dhe pasurinë e tyre.
