Ministria e Shëndetësisë ka ndërprerë kontratën me 1000 mjekë specializantë në 4 qarqe të vendit. Bëhet fjalë për 1 mijë mjekë që janë punësuar dhe kanë shërbyer gjatë periudhës së pandemisë në qarqet Tiranë, Elbasan, Shkodër dhe Fier.
“Çdo mjek që është duke ndjekur studimet afatgjata në fushëm e mjekësisë me kuotë të mbuluar nga Ministria e Shëndetësisë dhe Mbrojtjes Sociale, duhet të ndërpresë të gjitha marrëdhëniet e punës që ka me institucionin shëndetësor publike ose private dhe angazhimi i tij për të ofruar shërbim shëndetësor pranë institucioneve shëndetësore publike mund të bëhet vetëm me miratimin paraprak të Ministrisë së Shëndetësisë dhe Mbrojtjes Sociale dhe Fakultetit të Mjekësisë”, thuhet në vendimin e MSH.
Ministria e Shëndetësisë porosit Drejtoritë Rajonale të OSHKSH të marrin masa si më poshtë vijon:
- Të ndërpresin menjëherë kontratat me mjekët specializantë
- Të dërgojnë menjëherë listën e vendeve vakante të krijuara pas ndërprerjes së kontratave me mjekët specializantë., vazhdon më tej vendimi.
Vendet vakante do të shpallen në platformën elektronike “Mjekë për Shqipërinë”. Aplikantët e rinj do të vazhdojnë aplikimet për t’u bërë pjesë e listës së pritjes për çdo muaj, pasi konkurimi për mjek familje/të përgjithshëm nuk bëhet për pozicion specifik, por për njësinë vendore ku personi dëshrion të punësohet.
