Kryetarja e Partisë Socialiste në Tiranë, Blerina Gjylameti duket se nuk është në pozitat më të favorshme momentalisht në parti.
Shkak për këtë duket se është bërë një përplasje që siç raporton “newsbomb.al” ka ndodhur disa ditë më parë, në kongresin e PS-së.
Sipas portalit, shkak për këtë është bërë lista e kandidatëve për Këshillin Bashkiak të Tiranës, ku mesa duket mungonin emrat e ekipit të Gjylametit. Ndonëse ajo e ka mohuar një gjë të tillë, thuhet se përplasja ka nisur sepse Blerina Gjylameti ka pretenduar se nuk është pyetur për këtë listë ku dalloheshin më shumë emra të ekipit të Veliajt.
Në kuadër të këtyre tensioneve në PS, ditën e sotme është mbajtur mbledhja e grupit ku është vendosur se në krye të Komisionit të Posaçëm parlamentar për reformën zgjedhore, nuk do të jetë më Gjylameti, por ish-ministri i Infrastrukturës dhe Energjisë, Damian Gjiknuri.
