Të shtëna me armë zjarri kanë tronditur Elbasanin pasditen e djeshme ku kanë mbetur të vrarë dy persona. Pas Lulzim Bitrit që mbeti i vdekur në vendin e ngjarjes, ka ndërruar jetë dhe Ardian Subashi Çollaku.
Fillimisht ky i fundit u dërgua në gjendje të rëndë, por me shenja jete në spitalin e Elbasanit dhe nga aty, u nis për mjekim të specializuar në Spitalin e Traumës në kryeqytet. Pikërisht, në këtë vend ka ndërruar jetë. Kujtojmë se Bitri dhe Çollaku, u ekzekutuan me të paktën 15 plumba në afërsi të një karburanti në hyrje të qytetit të Elbasanit në vendin e quajtur “Rrethrrotullimi i Luleve”. Jo shumë metra larg vendit të krimit, në zonën e Metalurgjikut, policia gjeti një makinë tip “Volvo” duke u djegur, e cila besohet se i përket autorëve.
Sipas informacionevge të marra mësohet se Ardian Çollaku dhe Lulzim Bitri kanë qenë duke pirë kafen dhe menjëherë pas kësaj janë qëlluar me armë zjarri nga persona që po lëviznin në të njëjtë makinë të cilët ende nuk janë identifikuar. Sakaq, uniformat blu kanë sekuestruar kamerat e sigurisë në të gjithë perimetrin ku mendohet të kenë kaluar autorët, me qëllim identifikimin dhe kapjen e tyre.
Po kush është Ardian Çollaku?
Ardian Subashi (Çollaku) në 26 maj të vitit 2015 u arrestua nga efektivët e policisë, në qendër të qytetit të Elbasanit.
Një ditë para arrestimit ai ishte shpallur në kërkim ndërkombëtar nga Interpol Tirana, pasi Gjykata e Modenas, e kishte dënuar me 23 vjet e 3 muaj e 17 ditë burgim për veprat penale të “Shfrytëzimit të prostitucionit” dhe “Prodhimit dhe mbajtjes pa leje e armëve luftarake dhe e municionit” parashikuar nga nenet 110 dhe 600 të Kodit Penal Italian. Ndërkohë Subashi ka qenë edhe subjekt i OFL ku vitin e kaluar së bashku me 3 persona të tjerë u është kërkuar deklarimi i pasurisë.
