Pas tre ditësh në gjendje kritike, Fatos Cenaj, 58 vjeç, nuk ia doli t’u mbijetojë plagëve të rënda që mori më 8 qershor në Padova të Italisë.
Ish-polici shqiptar u qëllua me plumb në kokë dhe ndërroi jetë në spital, ku mbeti i shtruar në koma deri mëngjesin e sotëm.
Prokuroria e Padovës ka nisur hetimet për tentativë vrasjeje, duke marrë në shqyrtim disa pista, përfshirë një atentat të mundshëm me pagesë si akt hakmarrjeje të vonuar, për shkak të ndonjë konflikti të kaluar të Cenajt gjatë karrierës në Shqipëri.
Megjithatë, nuk përjashtohet as skenari i një plumbi të qëlluar rastësisht, ndoshta nga dikush që po testonte një armë në zonë.
Sipas ekspertëve mjekoligjorë, plumbi ka hyrë pas veshit dhe ka dalë nga balli, duke përshkuar kokën në trajektore nga poshtë-lart, një kënd i pazakontë që lë vend për shumë hipoteza.
Gëzhoja mungon, çka e bën të pamundur identifikimin e armës për momentin, nuk dihet nëse bëhet fjalë për pistoletë apo armë gjuetie.
Familjarët përjashtojnë çdo konflikt personal: “Fatosi s’ka pasur kurrë probleme me askënd, as këtu dhe as në Shqipëri,” kanë thënë ata për mediat italiane.
Autoritetet po analizojnë të gjitha sinjalet telefonike të regjistruara në momentin e ngjarjes në zonën Via Casoni Basse në Fontaniva, një vend i qetë dhe lehtësisht i aksesueshëm me makinë.
Hetuesit nuk përjashtojnë mundësinë që autori të jetë larguar menjëherë pas të shtënës, pa lënë gjurmë.
