Tenderat dhe skandalet në institucionet publike vazhdojnë të jenë ende problem shqetësues në vendin tonë. Pjesë e këtyre tenderave janë shumë kompani me dokumente false të cilat edhe pse të tillë vazhdojnë ende me punën e tyre duke përfituar para nga taksat tona. I tillë është edhe rasti i “Korsel Shpk”, i cili për tenderin për pastrimin e Tiranës, paraqiti dokumente false që mbërritën edhe në Bashkinë e Tiranës.
Me vendim Nr. 5, datë 27 janar 2022, firma “Korsel Shpk” e Maksim Hysen Fejzulla u përjashtua për 18 muaj nga tenderët, ankandet, privatizimet, koncesionet dhe çdo lloj transaksioni ekonomik-financiar, që do bëhet nga institucionet, entet publike e pushteti lokal, mirëpo në një burim për Gazeta Reforma, Gjyqtari i Gjykatës Administrative Tiranë, Emiljano Ruli, i uli muajt e përjashtimit pronarit të firmës nga 18 në 3 muaj ndonëse Gjykata kishte pranuar të gjithë falsifikimet e dokumenteve dhe kishte dhënë urdhër për 18 muaj përjashtim të kësaj firme.
Kujtojmë se pas dhënies së tenderit të pastrimit të kryeqytetit, KPK me anë të vendimit 264/2021, konstatoi se firma në fjalë, “Korsel Shpk”, mori pjesë në tender me dokumente të parregullta dhe të falsifikuara. Sipas KLSH dhe Zyrës së Auditit të Bashkive në Ministrinë e Financave, firma “Korsel shpk”, ka 346 aplikime tenderësh abuzivë; ku pronari Maksim Fejzulla ka paraqitur dokumente false, ndërsa në 40 kontrata pastrimi, 33 prej tyre i ka realizuar vetëm në masën 30-50% të volumit.
