Detaje të reja janë zbuluar në lidhje me rrëmbimin dhe vrasjen e Jan Prengës.
Makina me të cilën u mor peng Prenga, i ishte vjedhur këngëtares Kaje Tufa (Rustemi).
Sipas “Dosja.al”, makina është vjedhur natën e tërmetit të 26 nëntorit.
Automjeti “Range Rover”, u gjend i djegur tek “Ura e Gjoles”, pak orë pas rrëmbimit në Kamëz.
Jan Prenga u rrëmbye më 17 janar në Kamëz.
Ai ndërroi jetë 7 orë pasi u mor peng, si pasojë e dhunës dhe gjakderdhjes.
Shkak për rrëmbimin e tij, u bënë 238 kg kokainë, që i vëllai duhet t’ja dorëzonte tre grupeve kriminale.
Lënda narkotike arriti të dilte nga porti i Durrësit, por nuk shkoi kurrë në destinacion.
Astrit Prenga, vëllai i viktimës porositi familjarët të mos shkonin në polici.
Familjarët takuan më pas një pajtues gjaqesh në Shkodër, por gjithçka u prish në momentin kur RENEA zbarkoi në Shijak.
Katër porositësit e dyshuar për vrasjen dhe pengmarrjen e Prengës janë Gentian Doçi, Dritan Gramoz Rexhepi, Gentian Bleta dhe Korado Doda.
Të gjithë këta persona janë të skeduar prej vitesh për trafik ndërkombëtar kokaine.
Ndërkohë gjykata ditën e djeshme la në burg 5 të arrestuarit e deritanishëm, të cilët janë Bajram Hajri, Leonard Hajri, Olsi Turja, Elton Hajri dhe Festim Bexhdili.
