Një bombë shpërtheu mbrëmjen e së premtes pranë zyrave të kompanisë kombëtare të trenave, Hellenic Train, në Athinë. Policia greke konfirmoi se nuk ka të lënduar si pasojë e shpërthimit.
Sipas informacioneve paraprake, një gazetë dhe një faqe interneti lajmesh morën një telefonatë anonime pak minuta para shpërthimit, ku telefonuesi paralajmëroi për vendosjen e një bombe jashtë zyrave të kompanisë hekurudhore. Ai tha se mjeti shpërthyes do të detonohej brenda rreth 40 minutash.
Pas alarmit, forcat e policisë rrethuan menjëherë zonën përgjatë rrugës kryesore Syngrou Avenue, duke evakuuar banorët dhe mbajtur larg turistët në një zonë të njohur për baret dhe restorantet e saj. Zyrtarët në vendngjarje thanë se bomba ishte vendosur brenda një qeseje pranë ndërtesës së Hellenic Train.
Shpërthimi ndodhi në një periudhë të tensionuar për publikun grek, me ndjenja të forta zemërimi të rikthyer për katastrofën hekurudhore të ndodhur në Tempi në vitin 2023. Në atë aksident tragjik, i konsideruar më i rëndi në historinë hekurudhore të Greqisë, humbën jetën 57 persona dhe dhjetëra të tjerë u plagosën. Përplasja ndodhi pasi një tren pasagjerësh dhe një tren mallrash u futën në të njëjtën binar duke udhëtuar në drejtime të kundërta.
Kritikat ndaj mënyrës se si qeveria greke menaxhoi situatën pas aksidentit janë shtuar ndjeshëm në javët e fundit, me rastin e përvjetorit të dytë të tragjedisë, që preku kryesisht të rinj që po ktheheshin në universitet pas një feste publike.
