Shefi i Komisariatit të Policisë Rrugore Tiranë, Roven Zeka, së bashku me shefin e oficerëve të policisë gjyqësore në këtë komisariat, Sokol Novaku, dhe oficerin tjetër të policisë gjyqësore, Edison Tabaku, kaluan natën në bllokun e sigurisë pas lëshimit të urdhërndalimit nga SPAK.
Zeka dhe Novaku iu paraqitën mesditën e së shtunës në Drejtorinë Vendore të Policisë Tiranë, pasi ndaj tyre u lëshua një urdhër ndalimi si të dyshuar për veprën penale të korrupsionit pasiv në bashkëpunim.
Gjatë mëngjesit të së dielës, ata dhanë shpjegimet paraprake para oficerëve të BKH-së, të cilët i pyetën në kushte izolimi.
Rasti po hetohet nga prokurorja Elida Kaçkini, e cila ende nuk ka kërkuar nga GJKKO një masë sigurie për tre zyrtarët e policisë.
Sipas informacionit paraprak, dyshohet se zyrtarët kanë favorizuar një drejtues automjeti në këmbim të ryshfetit.
Ky automjet kishte shkaktuar një aksident, dhe edhe pse dy persona kishin kërkuar ndihmë mjekësore, drejtuesja e automjetit është proceduar në gjendje të lirë.
Shuma e dyshuar e ryshfetit është 2,000 euro, ndërsa oficerët kanë mohuar akuzat dhe kanë pretenduar se kanë zbatuar procedurat standarde. Për këtë rast, SPAK ka administruar edhe përgjime.
