Një ngjarje e rëndë tronditi Greqinë, ku një 12-vjeçar shqiptar, Kleoni, dhe një shok i tij grek humbën jetën në lumin Arahtho në Artë disa ditë më parë.
Megjithëse një emigrant shqiptar, Ledian Goga, ndërhyri menjëherë dhe i nxori nga uji të dy fëmijët, për fat të keq asnjëri prej tyre nuk mundi të mbijetojë.
Pas kësaj tragjedie, është vendosur që Kleoni të varroset në Shqipëri, ndërsa autoritetet greke kanë lejuar babain e tij të marrë pjesë në funeral.
Fillimisht, ai ishte i shqetësuar se pjesëmarrja në varrim mund të ndikonte në kthimin e tij në Greqi, por Ministri i Imigracionit, Makis Voridis, bëri me dije se shteti grek do t’i japë një leje qëndrimi për arsye humanitare, duke i mundësuar atij të shkojë e të kthehet pas funeralit pa problem.
Kjo masë është pjesë e një kuadri ligjor që trajton raste të tilla të jashtëzakonshme.
Në mes dhimbjes, familjet e dy të rinjve vendosën të dhurojnë organet e tyre për të shpëtuar jetë të tjera.
Veshka dhe pankreasi i Kleonit do të transplantohet në Patra, ndërsa marrësi është një burrë 40-vjeçar nga Peloponezi Perëndimor.
Ledian Goga, i cili u bë hero i situatës, ishte aty rastësisht kur dëgjoi thirrjet për ndihmë. Ai pa që fëmijët ishin duke u mbytur dhe pa hezitim hipi në një varkë së bashku me banorët lokalë për t’i shpëtuar.
Në një intervistë për mediat greke, Goga tregoi se u zhyti disa herë në ujërat e rrëmbyeshëm të lumit për të nxjerrë të miturit, edhe pse rrezikoi jetën e tij dhe pësoi një frakturë në këmbë gjatë përpjekjeve.
Ai theksoi se nuk kërkonte shpërblim, por veproi thjesht si çdo prind që do të bënte gjithçka për të mbrojtur një fëmijë në rrezik.
Falënderoi mjekët dhe autoritetet që i dhanë mbështetje gjatë trajtimit, ndërsa njoftoi se ndodhet jashtë rrezikut, megjithëse ka pasur probleme të vogla shëndetësore për shkak të përballjes me rrjedhën e fortë të lumit.
Ngjarja dhe akti i guximshëm i Ledian Gogës u bënë simbol i solidaritetit dhe humanizmit në një moment tragjik për komunitetin lokal.
