Gjykata e Korçës shpalli fajtor 21-vjeçarin Dritson Kurti për veprën penale “marrëdhënie seksuale me të mitur”, por vendosi pezullimin e dënimit me burg dhe vendosjen e tij në shërbim prove për një periudhë 5-vjeçare.
Rasti që tronditi opinionin publik u regjistrua vitin e kaluar, kur bashkëjetuesja e tij, një vajzë vetëm 13 vjeçe, solli në jetë një fëmijë. Kurti u arrestua menjëherë pas ngjarjes dhe Prokuroria e Korçës kërkoi fillimisht dënimin e tij me 7 vite burg. Pas aplikimit të gjykimit të shkurtuar, dënimi u reduktua në 4.8 vite. Megjithatë, vetë prokuroria i kërkoi gjykatës pezullimin e dënimit dhe zëvendësimin me shërbim prove, kërkesë që u pranua.
Avokati mbrojtës, Enea Cenko, u shpreh se klienti i tij nuk është i kënaqur me këtë vendim, pasi pretendon pafajësinë e plotë. Ai deklaroi se marrëdhënia me të miturën ishte pjesë e një tradite të njohur brenda komunitetit rom, ku martesat në moshë të re janë të zakonshme.
“Nuk ka pasur një kallëzim nga vetë vajza apo familja e saj,” tha Cenko, duke shtuar se çështja nisi nga prokuroria me procedim kryesisht. “Nuk duhet të kënaqemi me nenin 59. Kultura e një komuniteti nuk mund të kthehet në përgjegjësi penale, kur lidhjet familjare bëhen që në fëmijëri dhe sipas zakonit. Dritsoni nuk e ka gëzuar ende vajzën e tij, por tani ka mundësinë të jetë pranë saj.”
Avokati theksoi gjithashtu se do të shqyrtojnë mundësinë për të çuar çështjen në Gjykatën Evropiane të të Drejtave të Njeriut në Strasburg, me qëllimin për të fituar shpalljen e pafajësisë së plotë.
Sipas tij, ky nuk është një rast i izoluar, por përfaqëson një realitet të shpeshtë brenda komuniteteve të margjinalizuara që jetojnë sipas traditave të vjetra, të cilat, sipas ligjit shqiptar, bien ndesh me normat penale.
