Ish-deputeti i Partisë Demokratike, Ervin Salianji, është paraqitur këtë të enjte pranë Shërbimit të Provës, në vijim të procedurës së lirimit me kusht. Ai shoqërohej nga avokati i tij, Ledio Braho.
Salianji u lirua nga burgu më 8 korrik 2025, pasi Gjykata e Fierit pranoi kërkesën për lirim të parakohshëm, duke marrë në konsideratë sjelljen e mirë gjatë vuajtjes së dënimit.
Ai kishte përfunduar 9 muaj e gjysmë nga dënimi prej një viti burg, vendosur në shtatorin e kaluar. Si Burgu i Fierit, ashtu edhe Shërbimi i Provës, kishin dorëzuar raporte pozitive për të.
Dënimi ndaj Salianjit lidhet me çështjen e njohur si “Babale”. Ai u shpall fajtor për kallëzim të rremë, pas publikimit të një audio-përgjimi në të cilin pretendohej se Agron Xhafa, vëllai i ish-ministrit të Brendshëm Fatmir Xhafa, ishte i përfshirë në trafikun e drogës.
Në të njëjtën dosje u dënuan edhe Albert Veliu me 10 muaj burg dhe gazetari Jetmir Olldashi me 100 orë punë në komunitet.
