Duket se COVID-19, përveç shqetësimeve që lidhen me gjendjen shëndetësore të njerëzve, ka shkaktuar shqetësime të shumta edhe rreth ekonomisë dhe krizës që virusi mund të shkaktojë.
Ndër sektorët që pritet të dëmtohet shumë nga pandemia është edhe turizmi për të cilin qeveria nuk ka parashikuar asnjë ndihmë, ashtu sikurse as për median e bujqësinë.
Mirëpo, sipas ministrit të Shtetit për Mbrojtjen e Sipërmarrjes, Eduard Shalsi, qeveria është duke punuar me një paketë të veçantë për turizmin dhe sipas tij, duhet ndjekur me shumë kujdes edhe vendet e tjera për të mos përsëritur gabimet e tyre.
“Jemi duke punuar në disa skenarë. Po ndjekim me shumë kujdes se çfarë po bëjnë vende të ndryshme për të menaxhuar një situatë të tillë, pavarësisht se ekonomitë e vendeve janë të ndryshme. Për turizmin po punojmë për një paketë të veçantë të cilën po e studiojmë me kujdes. Eksperienca e vendeve të tjera po tregojnë se nuk duhet të hidhen hapa të nxituara. Ndërhyrjet duhet të jenë të mirëstudiura, pasi Shqipëria nuk ka luksin për paketa të mëdha financiare si vendet e tjera. Jemi të bindur se jemi në rrugën e duhur. Jemi në kontakt të vazhdueshëm me bizneset duke shfrytëzuar teknologjinë. Bankat nuk po bëjnë zvarritje, por nga marrja e vendimit deri në zbardhje të tij duhet pak kohë“, u shpreh Shalsi.
Kjo u konfirmua edhe nga Edi Rama, i cili i ftuar në “Opinion”, tha se ekspertët janë duke punuar, e megjithatë kryeministri shtoi se aktualisht qeveria ka nën vëmendje të tjera çështje, siç janë të moshuarit.
Ndërsa, sa i përket mediave kryeministri ritheksoi se nuk ka asnjë plan për tu ardhur në ndihmë atyre, teksa la në pikëpyetje se çfarë do ndodhë me gazetarët që ndodhen në vijën e parë të luftës.
