Vaksina anti-Covid e kompanisë AstraZeneca, e krijuar nga shkencëtarët e Universitetit të Oksfordit, ëhstë miratuar nga rregullatori i barnave dhe pritet të futet në përdorim të gjerë në Britaninë e Madhe.
Media prestigjioze britanike BBC shkruan se, miratimi i vaksinës së AstraZenecas ka shënuar një pikë kthese për Britaninë dhe do të zgjerojë fushatën e vaksinimit masiv. Kësisoj mund të rikthejë jetën në normalitet pas rritjes shqetësuese të rasteve me Covid-19 dhe pas shfaqjes së variantit të ri të Covid-19 në Britaninë e Madhe.
Qeveria e Britanisë së Madhe ka porositur 100 milion doza nga prodhuesi AstraZeneca, të mjaftueshme për të vaksinuar 50 milion njerëz.
Rregullatori i barnave ka miratuar përdorimin e kësaj vaksine, çka do të thotë se ajo është e sigurt dhe efektive.
Vaksina Oxford-AstraZeneca u krijua në muajt e parë të vitit 2020, si dhe u testua tek vullnetari i parë në muajin Prill. Që prej atëherë, vaksina ka kaluar nëpër prova klinike në shkallë të gjerë që përfshijnë mijëra vullnetarë.
Kjo është vaksina e dytë që përdoret në Britani, pas asaj të Pfizer-BioNTech. Mirëpo për dallim nga vaksinat e kompanive të tjera, AstraZeneca është më e lirë, ruhet në frigorifer standard dhe jo si Pfizer në -70 gradë, si dhe është lehtësisht e prodhueshme në masë./Gazetareforma.com/
