Në Gjykatën e Vlorës pritet të zhvillohet sot seanca për caktimin e masës së sigurisë ndaj katër personave të arrestuar së bashku me Flodian Plakun, i njohur edhe me nofkën “Pole Qorri”, i cili ishte në kërkim për vrasjen e Gentian Bejtjas në mars të këtij viti.
Tre nga të ndaluarit, Albano Lapshi, Ligor Doko dhe Armand Dano, përballen me akuzën për përkrahje të autorit të krimit, pasi dyshohet se e kanë ndihmuar Plakun të fshihej nga drejtësia. Personi i katërt, Julian Aliaj, u kap në shoqërinë e tyre në Orikum dhe kishte me vete një pistoletë. Aliaj rezulton i dënuar më parë për trafik droge.
Nga hetimet ka rezultuar se Flodian Plaku po qëndronte i fshehur në një hotel në pronësi të Ligor Dokos. Albano Lapshi dyshohet se i siguronte ushqim, ndërsa Armand Dano, me origjinë nga Shkodra, ishte berberi personal i Plakut.
Arrestimi i tyre u krye më 3 gusht në Orikum, pas një operacioni të ndjekur nga policia, e cila kishte vënë në përgjim dhe ndjekje Lapshin dhe Danon, të dy në lëvizje drejt hotelit ku fshihej Plaku.
Flodian Plaku u la në arrest me burg nga Gjykata e Tiranës dy ditë më parë. Ai akuzohet për vrasjen e Gentian Bejtjas, ngjarje e ndodhur më 15 mars 2024 në banesën e viktimës në Larushk të Fushë-Krujës.
