Prokuroria pranë Gjykatës së Shkallës së Parë të Juridiksionit të Përgjithshëm në Fier ka kërkuar dënime të rënda për tre persona të akuzuar për mbajtje dhe transport të lëndëve eksplozive.
Albi Mecini, Arafat Manërkolli dhe Ervis Cukali akuzohen për tentativën për të transportuar mbi 21 kilogramë lëndë plasëse në qytetin e Fierit, ngjarje e ndodhur më 28 shtator 2023.
Sipas organit të akuzës, tre të pandehurit kanë bashkëpunuar në këtë veprimtari të rrezikshme, ndërsa ndaj tyre rëndojnë akuzat për “Mbajtje pa leje dhe prodhim i armëve, armëve shpërthyese dhe i municionit” si dhe “Kundërshtim i punonjësit të policisë së rendit publik”, bazuar në nenet 278/7 dhe 236/2 të Kodit Penal.
Dënimet e kërkuara nga Prokuroria:
• Albi Mecini:
– 15 vite burg për mbajtje dhe prodhim të armëve shpërthyese;
– 4 vite burg për kundërshtim me dhunë të punonjësit të policisë;
– Bashkimi i dënimeve në 18 vite burg, dhe në zbatim të gjykimit të shkurtuar (neni 406 K.Pr.Penale), kërkohet ulja me 1/3 dhe dënimi përfundimtar me 12 vite burg.
• Ervis Cukali:
– 14 vite burg për armëmbajtje pa leje;
Pas uljes me 1/3, kërkohet dënimi përfundimtar me 9 vite e 4 muaj burg.
• Arafat Manërkolli:
– 14 vite burg për të njëjtën vepër penale;
Me përfitimin e gjykimit të shkurtuar, dënimi përfundimtar kërkohet të jetë 9 vite e 4 muaj burg.
Ngjarja:
Ngjarja ka ndodhur më 30 gusht 2023, kur Albi Mecini u kap në flagrancë në fshatin Vajkan të Fierit me dy çanta që përmbanin 21.3 kg lëndë plasëse artizanale. Lënda ishte e pajisur me mekanizëm shpërthyes në distancë, të montuar me celular. Mjeti i tij ishte lënë pranë lëndës në një rrugë dytësore, përballë qendrës “Viva”, në rrugën drejt vendit të quajtur “Safari”.
Dyshohet se bashkë me Manërkollin, banues në Dibër, dhe Cukalin, banues në Tiranë, kishin planifikuar një atentat ndaj një emri të njohur të botës së krimit në Fier.
Ndërkohë njëri prej tyre, Ervis Cukali, u arrestua pak ditë më parë nga Policia e Sarandës gjatë operacionit “Diving”. Ai udhëtonte me një mjet luksoz tip “Porsche Panamera” së bashku me Endrit Dokun dhe Imer Gegën. Të tre janë nga Kamza. Gjatë kontrollit në rrugën “Butrinti”, Doku tentoi t’i shmangej kontrollit duke u hedhur në det me një çantë në krah. Ai u ndalua nga Policia Kufitare me ndihmën e një skafi, ndërsa një polumbar gjeti çantën në thellësi të detit, brenda së cilës ndodhej një armë zjarri.
