Policia ka arrestuar dy të rinjë nga Lezha. . Pas kontrollit të ushtruar në një prej lokaleve ku të rinjë u kapën duke vendosur skedina policia ka ushtruar kontrolle të mëtejshme duke u gjetur edhe armë zjarri dhe armë të ftohta.
Të arrestuarit janë shtetasit, Orgito Hoxha 17 vjeç dhe Ardi Marku 18 vjeç. Gjithashtu janë proceduar penalisht edhe shtetasi F. P. dhe pronari i lokalit, shtetasi Ndue Biba.
Njoftimi i Plotë:
Lezhë
Kontrolle të befasishme në të gjithë qarkun, për kapjen e personave që mbajnë armë zjarri, armë të ftohta apo që ushtrojnë veprimtarinë e paligjshme të lojërave të fatit.
Finalizohet operacioni policor i koduar “Last Game”, i zhvilluar nga Komisariati i Policisë Lezhë.
Sekuestrohen armë zjarri kallashnikov, municion luftarak, përforcues grushti dhe aparate celulare, që shërbenin për ushtrimin e veprimtarisë së paligjshme të lojërave të fatit.
Vihen në pranga 2 shtetas dhe procedohen penalisht 2 të tjerë.
Shërbimet e Komisariatit të Policisë Lezhë, në vijim të punës për parandalimin, evidentimin dhe goditjen e paligjshmërisë, bazuar edhe në informacionet e siguruara në rrugë operative se në fshatin Shënkollë, në lokalin e shtetasit N.B., ushtrohej veprimtaria e paligjshme e lojërave të fatit, si dhe personat që frekuentonin ketë ambient mbanin sende të kundraligjshme me vete, kanë organizuar punën duke finalizuar operacionin policor të koduar “Last Game “.
Në kuadër këtij operacioni u arrestuan në flagrancë shtetasit: Orgito Hoxha, 17 vjeç dhe Ardi Marku, 18 vjeç, banues në Shënkollë, Lezhë, si dhe u procedua penalisht shtetasi F. P. dhe pronari i lokalit, shtetasi N. B.
Shtetasve O. H. dhe F. P., (klientë në lokal), gjatë kontrollit të ushtruar nga shërbimet e Policisë, u janë gjetur, në celularët e tyre, faqe për lotari sportive, ndërsa shtetasit A. M.,i është gjetur një përforcues grushti që plotëson kushtet e armës së ftohtë, të cilat janë sekuestruar në cilësinë e provës materiale.
Po në vijim të operacionit, është ushtruar kontroll në banesën e shtetasit O. H., në Shënkollë, Lezhë, ku shërbimet e Policisë kanë gjetur dhe kanë sekuestruar, në cilësinë e provës materiale, një armë zjarri kallashnikov dhe një sasi municioni luftarak.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme, për veprat penale “Armëmbajtja pa leje”, “Prodhimi, mbajtja dhe shitja pa leje e armëve të ftohta” dhe “Organizimi i lotarive të palejuara” dhe “Vënia në dispozicion e lokaleve për lojëra të palejuara”
