Këngëtarja kosovare Fjolla Morina, u arrestua dy ditë më parë pasi u ndalua në pikën kufitare të Morinës dhe iu sekuestruan dy armë zjarri.
Së bashku me të u arrestuan edhe dy shoqërues të saj. Në dëshminë e dhënë përpara policisë, Fjolla Morina ka pranuar autorësinë e armës që iu gjet në çantë, duke lënë jashtë përgjegjësive dy djemtë që e shoqëronin në momentin që u arrestua në pikën kufitare të Morinës.
Me armët që iu gjetën në çantën e saj, në bazë të kodit penal, duke qenë e akuzuar për trafik armësh në bashkëpunim, rrezikon deri në 20 vite burg.
Morina është shprehur se armën që kishte në çantë ia kishte dhuruar një miku i saj në Gjermani, i cili tashmë nuk jetonte më dhe se ajo i mbante ato në kujtim të tij.
Ndërkohë, dy djemtë, biznesmeni Fisnik Syla dhe shoferi Fitim Muji që u arrestuan bashkë me këngëtaren, janë shprehur se nuk kishin asnjë dijeni mbi armën që kishte këngëtarja.
Përpara grupit hetimor, Syla dhe Muji, janë shprehur se ata kanë qenë në makinë me këngëtaren vetëm për ta shoqëruar drejt Tiranës, dhe se nuk e kishin aspak idenë që ajo kishte marrë dhe pistoletë me vete.
Pyetje: Juve sot gjatë kontrollit të bërë në PKK Morinë ju është gjetur një pistoletë me 23 fishekë. Pistoleta ishte në çantën tuaj dhe fishekët në xhepin e sediljes së makinës?
– Ju deklaroj se jam nisur nga Kosova me makinën time për në Tiranë, pasi kam për të bërë muzikë dhe në makinë kam pas me vete dhe persona të tjerë, të cilët quhen Fitim Muji, i cili është shoferi im dhe Fisnik Syla, i cili është shoku im dhe rreth orës 02:10 minuta jemi futur në Pikën e Kalimit Kufitar të Kontrollit në Morinë Kukës.
Gjatë kontrollit më kanë gjetur pistoletën dhe fishekët në çantën dhe në makinë dhe këtë pistoletë e kam pas në njërën prej çantave, se unë kam tre çanta me vete se jam nis për Tiranë për këngë dhe këtë e kam pas prej kohësh se ma ka bërë dhuratë dikush.
Pyetje: Kush ta ka bërë dhuratë këtë pistoletë që ti thua s’është e imja?
– Një miku im nga Gjermania, i cili sot nuk jeton më.
Pyetje: Po personat që ju kishit në makinë a kanë dijeni se ju kishit pistoletë në makinë dhe në çantë?
– Unë ju deklaroj se nuk dinin gjë se unë kam pistoletë dhe as unë vetë nuk dija se kam në çantën e dorës pistoletë.
Biznesmeni 29-vjeçar, Fisnik Syla, i cili udhëtonte në makinë me këngëtaren ka thënë se nuk kishte dijeni për armët, por vetëm po e shoqëronte Fjollën drejt Tiranës sepse ajo do të këndonte në një koncert.
29-vjeçari rezulton të jetë djali i biznesmenit të njohur kosovar, Agim Syla. Mësohet se familja Syla ka në Belgjikë një rrjet prej prej 5 hotelesh në zonën e Saint-Niklaas, ndërsa vet Fisniku është president i ekipit të futbollit FC Gerda Ëaasland.
“…Ne jemi vetëm shoqëruesit e Fjollës, pasi ajo kishte për të shkuar në Tiranë për muzikë dhe nuk e dinim që ajo kishte këto pistoleta në çantën e dorës dhe në makinën e saj…”, ka thënë biznesmeni Syla për Policinë.
Ndërkohë të martën tre të arrestuarit do dalin para Gjykatës, ndërsa Prokuroria ka kërkuar për ta “Arrest me burg”.
