Gjatë natës, Irani ka lëshuar një tjetër breshëri raketash në drejtim të Izraelit, në një përshkallëzim të mëtejshëm të tensioneve.
Ndër objektivat e goditura ishte edhe zona e Beershebas, ku ndodhet Spitali Soroka, një nga qendrat më të rëndësishme mjekësore në jug të Izraelit, që u përfshi nga shpërthimet.
Soroka, vetëm 22 milje larg Rripit të Gazës, është spitali kryesor për evakuimin dhe trajtimin e të plagosurve gjatë konflikteve.
Pamjet e publikuara nga mediat ndërkombëtare tregojnë re tymi që ngrihen mbi ndërtesën, duke krijuar shqetësim për sigurinë e pacientëve dhe personelit mjekësor.
Presidenti izraelit Isaac Herzog e dënoi ashpër sulmin, duke e cilësuar si një goditje të drejtpërdrejtë ndaj civilëve.
“Një foshnjë në terapi intensive, një nënë pranë saj, një mjek që vrapon mes shtretërve, një i moshuar në një azil – këta ishin objektivat e Iranit këtë mëngjes,” shkroi ai në platformën X.
Ndërkohë, autoritetet iraniane e mohojnë se spitali ishte në shënjestër. Sipas agjencisë shtetërore IRNA, objektivi kryesor i sulmit ishte një strukturë ushtarake afër spitalit, konkretisht një shtab komandimi dhe inteligjence të ushtrisë izraelite, i pozicionuar në Parkun Teknologjik Gav-Yam.
Sipas tyre, spitali thjesht është ekspozuar ndaj valës së shpërthimit dhe nuk ka pësuar dëme të drejtpërdrejta.
Parku Gav-Yam, sipas faqes së tij zyrtare, ndodhet pranë Universitetit Ben Gurion dhe afër kampusit të degës C4i të Forcave të Mbrojtjes së Izraelit (IDF), ku aktualisht po ndërtohen objekte të reja ushtarake.
Raportet nga mediat izraelite kanë nënvizuar më herët rolin strategjik të kësaj zone për operacionet e inteligjencës së IDF-së.
Situata mbetet e tensionuar, ndërsa debati për objektivat reale të sulmit vijon mes akuzave dhe kundërakuazave.
