Ka punuar për shumë e shumë vite si mjek kardiolog në spitalin Ushtarak duke i asistuar edhe ekipit mjekësor të ish-diktatorit Enver Hoxha, por ka qenë pikërisht një arrest kardiak ai që i ka marrë jetën mjekut të njohur dhe ish-politikanit Sabit Brokaj.
Brokaj u nda nga jeta në moshën 78-vjeçare, pas një karriere të gjatë në mjekësi dhe politikë.
Mjeku Brokaj lindi në 7 janar 1942, në qytetin e Vlorës, më pas në vitin 1969 u diplomua për Mjekësi në Universitetin e Tiranës.
Pas diplomimit, Brokaj vazhdoi të shërbente si shef mjekësor i një brigade në Shijak nga 1969 deri në 1972.
Ndërsa deri në vitin 1984, punoi si mjek kardiolog në spitalin Ushtarak të Tiranës.
Po në të njëjtin vit u bë profesor në një shkollë mjekësore në Tiranë, më pas Zëvendës Dekan i shkollës në 1987, dhe Dekan në 1989.
Ai udhëtoi në Francë për të studiuar kardiologji në 1979 dhe ekokardiologjinë vitin 1982 dhe po gjatë kësaj periudhe shërbeu si një nga mjekët personalë të Enver Hoxhës.
Pas rënies së diktaturës, Brokaj iu fut edhe politikës, duke u rreshtuar në radhët e socialistëve.
Nga shkurti deri në dhjetor të vitit 1991 ai ka mbajtur postin e ministrit të Shëndetësisë.
Më pas, në vitet 1996 dhe 1997 u zgjodh deputet i Asamblesë Popullore në 1991, 1996 dhe 1997.
Më 25 korrik 1997, Brokaj u emërua Ministër i Mbrojtjes, post që e ka mbajtur deri në vitin 1999.
Ndërkohë, pas lajmit për humbjen e jetës së Sabit Brokajt, kanë vërshuar në rrjetet sociale edhe mesazhet nga politikanët kryesorë të vendit, që kanë folur me superlativa për jetën dhe punën e tij.
/GazetaReforma.com/
