Trupi i pajetë i Faton Hajrizit, i cili u ekzekutua në Serbi ka mbërritur në Kosovë. Avokati i familjes Hajrizi, Arianit Koci tha për mediat e Kosovës se trupi i Faton Harazit iu është dorëzuar organeve përkatëse.
“Trupi i është dorëzuar Instituti të Mjekësisë Ligjore, Prokurorit dhe Policisë, ata do të vazhdojnë me procedurat e mëtejshme. Të gjitha dokumentet që kam marrë ia kam dorëzuar prokurorisë,”- tha Koci.
Faton Hajrizi u arratis nga një burg në Kosovë më 8 korrik, ndërsa 10 ditë më pas, më 18 Korrik, dyshohet se qëlloi për vdekje një polic serb dhe plagosi kolegun e tij në orët e para të 18 korrikut në Lloznicë, qytet në pjesën perëndimore të Serbisë. Pas sulmit, autoritetet serbe e shpallën në kërkim dhe një dite më pas, më 19, Faton Hajrizi u vra nga autoritetet serbe pranë kufirit të Lloznicës.
Ai dyshohet se kishte udhëtuar në Serbi me dokumentet e vëllait të tij, Artan Hajrizi. Ky i fundit ishte paraqitur para autoriteteve në Gjermani, ku jeton e punon, dhe ka denoncuar se i vëllai, Fatoni, i kishte vjedhur dokumentet e identifikimit në banesë. Në vendngjarje u gjenden dokumentet e Artan Hajrizit, edhe pse u raportua se ai nuk kishte lidhje me vrasjen e ndodhur, Serbia ka kërkuar që Gjermania të ekstradojë të vëllanë e viktimës.
