U përcoll për në banesën e fundit Admir Murataj grabitësi që humbi jetën tre ditë më parë në një shkëmbim zjarri me policinë në Rinas.
Familjarë dhe të afërm i kanë dhënë lamtumirën e fundit në ceremoninë e varrimit e cila u mbajt në fashtin Çerem, të Tropojës.
Në varrim nuk ka mundur dot të jetë vëllai i tij Aleksandër Murataj, për shkak se ndodhet i burgosur në burgun 313.
Ai nuk mori dot leje pavarësisht se instancat përkatëse ishin lajmëruar dy ditë para, për kërkesën e tij.
Kujtojmë se Admir Murataj u vra tre ditë më parë, pas një grabitje spektakolare brenda në pistën e aeroportit të Rinasit.
Furgoni i grabitësve, që mendohet të kenë qenë katër veta, u ndoq nga policia pas grabitjes, ku pati shkëmbim nga të dyja palët duke lënë të vrarë Admir Muratajn.
Admir Murataj njihet ndryshe edhe si Admir Nikaj dhe është me origjinë nga Tropoja.
Murataj, megjithëse në kërkim ndërkombëtar që prej vitit 2013, u konsiderua si truri organizator i 3 grabitjeve spektakolare në Tiranë të më shumë se 5 milionë eurove, por autoritetet dështuan të binin në gjurmët e tij gjatë këtyre 6 viteve.
Admir Murataj u vra nga policia rreth 2 km larg aeroportit, ndërsa iu gjetën në trup dy kallëpe dinamiti, një granatë dhe një kallashnikov.
