Një ngjarje e rëndë u raportua në SHBA ku bëhej me dije se një shqiptare është ekzekutuar nga partneri i saj në SHBA, i cili më pas është vetëvrarë.
Ndërkohë që Arjana dhe Arben Gllafce u gjetën të pajetë të dielën në shtëpinë e tyre në Fort Wayne, të afërmit e shqiptares kanë prekur me shkrimet e tyre në rrjetet sociale.
Babai i saj ka prekur me postimin e tij, duke e përshkruar atë se sa prind shembullor që ishte.
“Ah sa shumë u lënduam moj bir i babit, e pazëvendësueshme dhe shpirti jonë Arjana. U largove atëherë kur duhej të jetoje. Të shikoje lumturinë e djemve të tu, që aq shumë i deshe dhe u ishe përkushtuar si një prind shembullor. Shpirti ynë e di se si po durojmë këtë dhimbje të madhe dhe këtë sprovë që na dha Zoti në pleqëri. E paharruar do të mbetesh në zemrat tona dhe të atyre që të kanë njohur. Të ndritë shpirti dhe u bëftë dritë në rrugëtimin e fëmijëve të tu. E parajsës qofsh bashkë me bashkëshortin që Zoti nuk ju ndau as këtu. Qoftë i lehtë dheu! Babi dhe mami që të kanë dashur aq shumë”, shkruan ai.
Me anë të një postimi në Facebook, motra e Arjanës shkruan se do e marrë malli tmerrësisht. “E bukura, e shtrenjta motra ime. Qofsh e parajsës. Do më marrë malli tmerrësisht”, shkruan motra e Arjanës.
Sipas hetimeve, Arbeni ka qëlluar disa herë mbi gruan e tij e më pas ka kryer vetëvrasje. Ata kishin dy djem një 24 vjeç dhe një tjetër në moshë minorene autik. Të afërm të familjes Gllafce kanë hapur një llogari në Gofundme për t’i ardhur në ndihmë fëmijëve tashmë jetimë, si dhe për të sjellë familjarë të tyre në SHBA për t’u kujdesur për djemtë.
