Mediat italiane kanë raportuar ditën e sotme se shtetasi Moisi Habilaj, i akuzuar për trafik droge në Itali, është arratisur nga shtëpia ku qëndronte me urdhër të drejtësisë italiane në “Arrest shtëpie”.
Kujtojmë se më 17 dhjetor 2020, Apeli i Katanias lë në fuqi vendimin e shkallës së parë për Habilajn, duke e dënuar atë me 15 vite e 5 muaj burg.
Duke qenë se avokatët e tij e kishin apeluar dhe këtë vendim, shqiptari po qëndronte në masën e sigurisë “Arrest shtëpie”.
Pas kontrollit të bërë nga policia, u bë me dije se Habilaj nuk është gjetur në banesën e tij në adresën që kishte dhënë në Raguza të Italisë.
Së bashku me Moisi Habilajn, Gjykata e Katanias dënoi edhe Meridian Sulën (8 vite), Nezar Seitin (6.8 vite), Antonino Rielan, Vinccenso Spanpinaton, Angjelo Buzakan, Xhanluka Pasavantin dhe Xhuzepe Grekon. Në Shkallën e Parë Sulaj u dënua 7.4 vite dhe Seiti 6.4 vite burg.
Kujtojmë se, Moisi Habilaj është konsideruar kreu i bandës së narkotrafikantëve italo-shqiptar. Po ashtu edhe vëllai i tij Florian Habilaj vijon të jetë në kërkim.
Moisi Habilaj është edhe kushëri i ish-ministrit të Brendshëm, Sajmir Tahirit. Ish-ministri pati një kalvar të gjatë gjyqësor pas përgjimeve që dolën dhe akuzave ndaj tij se ishte i përfshirë në trafikun ndërkombëtar apo duke mbështetur e dhënë garanci për grupin e trafikantëve me të cilët kishte edhe lidhje farefisnore. /Gazetareforma.com/
